ໃນວັນທີ 28 ມີນາ 2025 ທີ່ຜ່ານມາບໍລິສັດພີທີທີ(ລາວ)ຈຳກັດ ໄດ້ເຂົ້າຮ່ວມງານຖະແຫລງຂ່າວການກະກຽມຈັດງານແຂ່ງຂັນມວຍລາວໄຟ້ພາຍໃຕ້ຊື່ Fight night ຂອງສະຫະພັນກິລາມວຍລາວແຫ່ງຊາດ ທີ່ນະຄອນຫລວງວຽງຈັນ ເຊິ່ງຈະໄດ້ຈັດການແຂ່ງຂັນຂຶ້ນທີ່ເມືອງມໍລະດົກໂລກ ແຂວງຫລວງພະບາງ ແລະ ປະເທດການາດາຢູ່ໃນໄວໆນີ ໂດຍການເຂົ້າຮ່ວມຂອງ ທ່ານ ສຸກດາລາ ນໍລະແສງ ຮອງປະທານສະຫະພັນມວຍລາວແຫ່ງຊາດ, ພາກສ່ວນທີ່ກ່ຽວຂ້ອງແລະນັກຂ່າວສື່ມວນຊົນເຂົ້າຮ່ວມ

ຈຸດປະສົງຂອງການຖະແຫລງຂ່າວໃນຄັ້ງນີ້ເພື່ອເປັນການກະກຽມນັກກິລາເຂົ້າຮ່ວມແຂ່ງຂັນທັງພາຍໃນແລະຕ່າງປະເທດ ເປັນບາດກ້າວສຳຄັນການກໍ່ສ້າງຊຸກຍູ້ພັດທະນາກິລາມວຍລາວໃນຫລາຍໆດ້ານເປັນຕົ້ນແມ່ນບຸກຂະລາກອນກຳມະການຕັດສິນ ຄະນະກຳມະການຈັດການແຂ່ງຂັນ ຄູຝຶກແລະນັກກິລາລາວໃຫ້ມີປະສົບການໃນລະດັບປະເທດກໍຄືໃນລະດັບສາກົນ ສ້າງໃຫ້ຂະບວນການກິລາມວຍລາວຮັບປະກັນທາງດ້ານຄຸນະພາບ ມີທ່າກ້າວແລະເພີ່ມທະວີການພັດທະນາຍິ່ງຂຶ້ນ ແນໃສ່ສ້າງຂະບວນການໃຫ້ເຍົາວະຊົນຫນຸ່ມນ້ອຍໃຊ້ເວລາວ່າງໃຫ້ເກີດປະໂຫຍດຕໍ່ຕົນເອງແລະສັງຄົມສ້າງໃຫ້ເຂົາເຈົ້າມີສຸຂະພາບດີ ຕ້ານກັບປາກົດການຫຍໍ້ທໍ້ຕ່າງໆໃນສັງຄົມ ນອກຈາກນີ້ທັງເປັນການແນໃສ່ແຜນການພັດທະນາກິລາມວຍລາວໃນການປັບປຸງການສ້າງນັກກິລາມວຍລາວເຍົາວະຊົນລຸ້ນສືບທອດໃນລະດັບສະໂມສອນພາຍໃນປະເທດໃຫ້ມີຄວາມເຂັ້ມແຂງສາມາດສ້າງນັກກິລາທີ່ດີເດັ່ນທັງປະເພດຕໍ່ສູ້ເພື່ອທົດແທນນັກກິລາທີມຊາດໃນປະຈຸບັນຢ່າງເປັນລະບົບ



